Unseri Lehrstell für dich

Mir chönne alli drei Johr amene junge Erwachsene e Lehrstell abiete. Di nöchscht Lehrstell wird im August 2026 frei.

Du interessiersch dich für d'Lehrstell ab August 2026?

Abem Juni/Juli 2025 wird die freii Lehrstell bi uns usgschribe und du chasch dich für d'Lehr als Kauffrau/ Kaufmann EFZ Branche Bank uf Wunsch und Eignig mit Berufsmaturität bewerbe.

D'Vorstelligsgschpröch werde im August/September 2025 stattfinde. Nocheme Erstgspröch werde mir dir es Feedback geh und falls mir beidi de gliche Meinig sind und mir uns chönnet vorstelle dass es passt, dörfsch du für 1 Tag zu uns uf d'Bank. An dem Tag wirdsch du alli unseri Abteilige kennelerne und no e bessere Idruck vo dine potentielle Betreuigspersone, Ufgobe etc. chönne mache.

Wenn nocher immer no alles passt für uns beidi, erstelle mir di Lehrvertrag und freue uns, dich abem August 2026 zu unserem Team zähle z'dörfe.

«E Banklehr bietet vieles:
Bsunderi Idrück aber au Verantwortig.

Pack d'Chance und bekumm Isicht in die einzigartigi Welt vom Geld kombiniert mit wirtschaftliche Zämmehäng.»

Jasmine Hirt, Lernende Raiffisebank Rynach 2022

Schnupperlehr

Leider chönne mir dir kei Schnuppertag/Schnupperwuche vor Ort abiete. Mit em Bankkundegeheimnis sind mir zu strengste Diskretion verpflichtet und könne dir somit kei direkte Iblick in d Tätigkeite vonere Kauffrau/vomene Kaufma Bank in unsere Bank gwähre.

Generelli Informatione zur Banklehr bi Raiffisebanke in dr Schwiz erfahrsch du im Live-Stream unner folgendem Link:

raiffeisen.ch.

D’Raiffisebanke in de Nordwestschwiz organisiere jöhrlich im Früehling gmeinsami Schnuppernomittäg. Die nöchste Termin finde im Früehling 2025 statt.

Für konkreti Froge rund um d Lehr Kauffrau/Kaufma Bank EFZ, kasch du dich jederzit gern per Mail an uns wende.

Witeri Froge und Antworte wo dich chönnte intressiere

Weli Aforderige muesch du erfülle für e Stell?

Gueti Schuelnote im Niveau E oder P sind Vorussetzig. Do je nach Schuel d'Leistigsasprüch unterschiedlich sind, bruche mir zuesätzlich zu de Schuelzügniss no de Multicheck.

Neb de schuelische Leistige söttisch du pflichtbewusst, pünktlich, zueverlässig, fründlich und nett im Umgang mit de Kunde si.

E hochi Flexibilität und Ehrgiz gsehnd mir ebefalls sehr gern.

Weli Note söttisch du ha?

Du söttisch e Durchschnitt vo 4.5 - 5 in de Kernfächer ha. D'Erfahrig zeigt, dass d'Lehr sunscht z'anspruchsvoll isch.

Wie viel Schueltäg het mä während de Lehr?

In de erschte zwei Lehrjohr hesch du 2 Täg Schuel pro Wuche und im dritte Lehrjohr isch's no 1 Schueltag.

Falls du dini Usbildig mit Bruefsmatur machsch, hesch während de ganze Lehrzit 2 Tag pro Wuche Schuel.

Dezue chömme no die überbetribliche Kürs, wo meistens eimol monatlich stattfinde.

Wie muss ich mich azieh?

D Kleiderordnig het sich ziemlich verändret in de letschte Johr. Im Kundekontakt isch momentan Business Casual agseit - wenn mä kei Kundekontakt het, cha mä au lockerer azoge cho.

Witerbildigsmöglichkeite noch de Lehr

Wenn du möchtisch in de Raiffisegruppe und im Bankwäse blibe, hesch du d'Möglichkeite, dich immer witerzbilde dich uf e Bereich zum Bispiel Alage z'spezialisiere und verschiedeni Zertifizierige z'mache. D'Witerbildigsmöglichkeite in de Raiffisewelt sind sehr vielfältig und gross, so wie au usserhalb vo de Bank. Mit dim Lehrabschluss chasch du je nochdem no d'Bruefsmatura ahänke und denn a d'Wirtschaftsschuel, höcheri Fachschuele wie au Fachhochschuele bsueche.

Jasmine wieso isch d'Lehr bi de Raiffisebank Rynach genau s'Richtige?

«Du chasch si wer du si willsch! S'Team vor Raiffisebank Rynach wird dich so wie du bisch als Individuum unter ihri Fittiche neh und unterstütze. Au wenn jede Afang schwierig isch, hesch du mit dr Raiffisebank Rynach en Arbeitgeber wo sine Agstellte stets treu isch und sich in jeder Situation für dich stark macht.»